SANYO JUU SANYO TOP

Ideka taarifa ya habari ya saa imweri ra kio ikameria kushomwa ni Ngulamu Mwaviro, mdawida tiki kufuma Werugha, ideka wangia Fred Obach Machokaa na kipindi chake cha Sanyo Juu Sanyo Top.

Iji redio yedu iko na magho, kufuma taarifa ya habari yazoya kushomwa mpaka kipindi cha Sanyo juu chisie, dideka danyama kima dikisikiria. Mndu ukatima kudeda ghadi na ghadi wadima kulaswa lui lwa kifirika uendetangalwa ni nganda. Ngelo imu ikabonyeria ndeidimikagha dinyame kima, aba odawusa redio yake na waenda cha nyumba ya mbeo. Iro ngelo angu modo ⚡ (stima) na virerende 📺 (TV) vingi risekoghe, nyumba ra mbeo rideka risukie shu. Sasa aba odaenda nyumba ya mbeo na wakora taya yake ya chemuli na udasikiriagha redio yake na isi dasighwa dikioda modo irikonyi dikizighana seji mswara ghukuruswagha ni mao.

Ichija kipindi cha Sanyo Juu chikasia na aba wacha cha irikonyi na dakumba mswara ghodu nandenyi mbwaeri na kila umweri waenda kughorua bulenyi.

Kila wuja aba odeka wajaza makoto gha kipindi cha Sanyo Juu Sanyo Top na waduma cha Nairobi.

Siko ituku jimu disikiriagha washindi wa kipindi cha Sanyo Juu Sanyo Top, na dikasikira irina ja aba jashomwa, kedi washinda redio ya Sanyo mbishi.

Ichokio delala na ngolo rihorie dikimanya dapata redio mbishi.

Na dikamuka muka kavui ya njumwa ndazi na barua yeendaonda redio yedu ikacha. Aba ukapatwa ni charo chedamba cha Nairobi, uendeonda redio yedu.

Ituku jeendaionda, ukabongolua konikio na njogholo ya imbiri. Ukafunga charo mpaka Nairobi hatabsako usekoo uichinsa nicha. Saki iro ngelo simi ringi ra mkono risekoghe, ela upatireghe chia mpala ukaendalwana na mghenyi wake umunnairobi na ukamwenka mpa ofisi ya KBC ukaonda rodio yake.

Kesho yaro ukabongolilua na njogholo ya imbiri, ukawoka charo chake ukacha na redio yedu.

Redio ya wandu angu ideka mbishi isi ndedekoo na nguma reiadada kisha kisha. Station ikawarilwa basi yekundikia ikaie ni chenio isikirilwagha. Mndu ukaighalua kisha wadima kupatwa ni mwandu ghogwa na kuwuka.

Iyo redio angu idedamgolwangolwa sa ighi, tikaisikiria mpaka dikazoghua. Ideka yashonelwa kitambara chake cheifinikira isengilo ni teri na hata ngelo kwa ngelo yedofurilwa wughanga ghwa nyeche eri mitambo risekedafunwa .

Na kela mndumu ochefumia hao, dizoghue na redio yedu sa nicha, ituku jimu dailiwa shighadi dikaendalisha, dendawuya ndedecheiwoma sena mpaka idime huwu.

Dikachasikira wei yawonelo cha mghange dawida, mzi ghumu kavui na mkombezi. Dikajokwa ni mware dikakunda kwenda izighana na kama loli ni yedu diiwuye nayo, ela mao ukadizera disighane nayo Mlungu udirasimiagha dishame wuzuri na diguo zima ya ndighi zaidi.

Naduagha nikiighesha.

more recommended stories