MWAKISHALUA WA MKAMBA

"A Zulu witchdoctor throws his bones on a straw mat, and by reading their layout receives messages from dead ancestors which he relays to the Chief and rest of the tribe."

Mwakishalua wa Mkamba odevalwa Mwanda andu kumu kuwangwagha Mkamba, ela idhamwa mlamba eka naisi ya Wundanyi nao ukasea Cha Rong’e juu.

Kazi yake erekoghe niyelaghua wula, kurighita wandu na kutumia fighi kuruma wamaiza iji weka kula. Luma lwa ngelo ndini ukasea cha Mbololo na ukaendelea na wuya ghwake ghorighita.

Ituku jimu ukaloda ndodo wei kedi uwona waela ngoe wikiida na choka mbaa ya chuma, wokoni ikimaria Dawida kwa huwo ukalola kila chia elegha iyo choka mbaa ya chuma isemarie Dawida. Mwakishalua Mkamba mrighiti m’baa wa Mbololo ukatumia wuya na mwambori yewinga waela ngoe . Ngelo reli ikiaghwa yamba iidisho aghadi ya mbuwa ra wambololo, waisanga wikalegha na kulomba waghosi witime kuwidederia kwa wundu ghwa ugho mpango, ela waela ngoe wikaghora ni lazima reli iidie aho kulingana na ramani yaro saji yachorwa.

Basi mrighiti Mwakishalua ituku jimweri owuka luma lwa kesho chiri, uko na nyungu, vishere na maghanga ghebonya malagho ghape. Mwakishalua oenda ukadunga ngokoro na kutawaria madedo ghake gha wurighiti, ukawanga shimba iwi ra kiwomi, shimba rendacha rikasea kidombo ukaridedesha kwa mchoghono ghwa wurighiti, ukariduma na kurineka masharti agha, “ghendenyi aja reli yawaaghwa ni waela ngoe na wandu wachilu, ela mkavika aho muwibwaghe waela ngoe wose na wandu wa chilu muwisighe ata msake wishoghonua.”

Huwo irija shimba rikabonya wokoni seji ridumilo, waela ngoe wafue wengi weni ela wandu wa chilu wesighwa moyo. Iro shimba iwi. rechebwaghwa ni Koloneli Patterson mwaka ghwa 1898 kavui na mbenge ya Tsavo. Uo mundu odetesilwa ni Wadawida wamu wazumba kumanya chia emeria ndighi ra iro fighi. Kwa huwo nikokoni reli echa idiria Dawida angu wadawida wakitina wedesimwa ndighi ni waela ngoe kwa kila chia

@Fred Mmbololo copy right 

more recommended stories