MHESHIMIWA MDUMIKI ADIDIMISHA NYOTA YAKE YA KISIASA KWA MATAMSHI YA KUSISIMUA

 

Katika hafla ya hivi majuzi iliyoandaliwa kwa heshima ya wakaazi wa Taita Taveta wanaotoka maeneo ya Kaskazini mwa Kenya, Mheshimiwa Peter Shake, almaarufu Mdumiki—ambaye pia ni Canon katika Kanisa la ACK—aliwashangaza wengi kwa hotuba yake ya kusifu na kuhamasisha jamii ya Cushites kujitokeza katika siasa za kaunti.

Mdumiki, baada ya kimya kifupi cha kutafakari, aliamua kutumia jukwaa hilo kuwapongeza jamii hiyo kwa bidii yao katika biashara na ujenzi wa taifa. Zaidi ya hapo, aliwahimiza kujiandaa kwa uchaguzi mkuu ujao kwa kusimamisha wagombea wao kwa nyadhifa mbalimbali, ikiwemo MCA, Seneta, Mwakilishi wa Wanawake, Gavana, na hata Ubunge.

Hata hivyo, matamshi haya yameibua mjadala mkali. Baadhi ya wakaazi wameyachukulia kama usaliti wa kisiasa, hasa ikizingatiwa kuwa Mdumiki alipigia kura ya “NDIYO” Mswada tata wa Finance Bill 2024 uliowakera Wakenya wengi. Kauli moja mitandaoni ilisomeka:

“Pengine Mdumiki anajua ile YES yake itampeleka nyumbani, sasa anataka viti vichukuliwe na wachia mbai!”

Fununu kuwa anaandaa kuwania kiti cha Ugavana mwaka 2027 zimezidi kuchochea mjadala, huku wengi wakijiuliza: Je, matamshi haya ni mkakati wa kujijenga kitaifa au ni kaburi lake la kisiasa?

Katika siasa, kila neno huweza kugeuzwa kuwa silaha au daraja. Mdumiki anasalia na jukumu la kuwasiliana kwa hekima na kuunganisha jamii zote—kama kweli anataka kuendelea kupanda ngazi za uongozi.

more recommended stories