VILONGOZI WE LUMA NA KUFURIA DAWIDA

Isanga ni Mwasighwa wakundwa. Kukaie Mshapa ando, ama kukaie msowa kindo chingi m’wose mchasigha ivija mko navo na muwuye iranginyi.

Wandu wapo, iguo nawonie wusaliti mubaa kufuma kwa wulongozi ghwa Dawida na Tuweta. Kedi Wei vilongozi vichagha mashakenyi na wijibonye kulila kuchumba awaje wapatwa ni ndengwa ni wusali m’baa. Wei, mndu wacha ifonyi angu kwafuilwa na wajibonya kulila kuchumba oho kwafuilwa ni wusaliti kuchumba wusawi.

Ela Lee iguo mwamanyire iri mbisi mrisaghuesa vilongozi ni weke mwatee? Yaani iguo vilongozi wiche wijibonye ndeviichi wala ndewimanyira kela wandu wichafunchuilwa vighato vawo na mizi yawo wiaghie na w’asi mubaa, ni w’aya. Wandu diichi winekwa maeresho gha ndenyi (intelligence) na wajibonya saa wandu wa kawaida ni kukunda kuvisa mawiwi ghawo.

Cheshinua wajibonya Kwa kirerende wabukia mndu uko na iyo mbuwa na wawemanya putu waweseka wandu wiaghie aho dali. Awa weke bwana ngelo wewangilo ni uho mndu ‘Sparkle’ widewuya Kwa waisanga wiaghie vigharo vawo aho na kuwizera ndokuna mndungi uchawiinja aho wiko. Izerwagha hata kilongozi umu wakiwomi ukaanyira ukighamba, nyumba rikafuchulwa wawoka kuwa dera sa waka. Ngelo yabusa dimshonie madera ghake uroghe.

Awa weke bwana wakundikie widwailo hatua wose kuwokia Gavana, Seneta, Mao odu na wabunge wambao wa ibara ja Nairobi na awa wa Kaunti. Wifunye msoro ghowika wandu nicha kwanza wikizighana chia iko ifwane yebonyera awa wose wipatire ni ndengwa.

Dikazighana nicha dawona Dawida na Tuweta yaenda na kusia. Dikaendelia na ghonughu wulongozi isanga jedu jiendagha putu. Kuwokia Ore Community Land, Kishushe, Mata, Lesesia, Teita Sisal, na kuzima, 8sanga jedu jasarwa putu ni 2amaiza. Sena loli widikiragha? Daine wulongozi angu ni weke vhawowa weluna na kufuraa, sa mbewa ya mwamkoi?

Weni Mwangeka dikaie meso na diwuke didederie ndoe redu. Dikasoghia ibi vilongozi wididederie ni tee, isanga jedu jiendagha jisie.

more recommended stories