Ideka yatangazwa wei mramba kavui na chakareli aja Mwashoti mbuwa reko resara. Na dikabongolua kokesho njogholo ya imbiri.
Icho kio mao okoghe wadeka pure ya maduma na ukadihuya yedu ya wandu wawi, ukaivimba nicha fuwenyi na ukairighiria leso eri imazire iruke. Dikaikumba kikuchunyu na machi ghedu ghenywa dikadwa na kiriba cha mavuda gha elianto. Icho kiriba dechiwangaa mwaibemba.
Aba okoghe wasuwa chufu redu kwa wuya m’baa na inolo desighiloo ni wawa wa madafu, rikakala shuu sa shembe, ya mghosi Mwanganga wa Mbaramghondi, yeaika wana.
Dikawoka charo chedu na miramira na viwo wedu iyongo. Aja Lughongo lwa lughojo, dikakwana na mghenyi m’baa wa Aba, Mghosi Mwacharo na mkwake. Charo chikakaiya chasinga na dikawoka kudughuna cha mramba.
Diwokieghe charo kokio dechavika mramba iruwa jalighisa kuvika ludedo. Ee divikagha dikakuwa wandu wamu wavikieghe koimbe na wikasasarika na kireti wikisara mbuwa.
Kila mndu waenda ukibolabola midi sa kubonyera mwano ghwa aja mbuwa yake iidiagha.
Isi bila kusaghisa ngelo dewoka kubonya mano redu. Dikaamba isi yedu dasara ngara na dichewaghiana lawu iji iro mbuwa rachawuria ra loli.
Kazi ikakaiya ni kubola midi na kusoghoda kiimbiri na vikuchu vedu mayonge. Kuwika kikuchu andonyi ndokuko angu kuwuya nanyuma kusemanyikie.
Iyo mbuwa ya aja mramba dikaikaba meso dikaiwona ni ya mvono mduu. Ni ya kitivo na inorie yefunya vindo va kiloliya.
Baada ya masaa adadu diko na mware ghodu ghoboisa mwano siko daenda dikakwana na wajamaa wamu na weweni wacha wikibara mwano ghwao mpaka dikacha kwana.
Siko ibonyeriagha mwano ghwa ndoe yawo na ghodu radumbuana ghadi na ghadi. Kibelele chedu kilazi cheka kwawo na chawo kilazi cheka kodu. Sigha aho ibonyerie wandu ndewiwewadana. Kila umu okunda mwano ghwake ghukaie seji waghushama. Siko wandu wawoka kukumbiana memu kisha mpaka walodana na chufu rikalie shuu.
Ini aho nanyama chuku na wowa ghwanienda mpaka nasighwa kutini kukunyea. Nawona sa wandu wiwokagha kurengetana seji mndu urengetagha ngongodi yeneka ng’ombe!
Nikawona asi nifuyagha kireti cha ngudu nijigho ni mbisi sa furo ighosere.
Ngelo chenio wandu wikumbianagha memu wajamaa wamu nawo hewo wabusa naweweni wikishama mwano ghwa ndoe yawo. Na weweni mwano ghwawo ghwadumbua yedu na ya awaja wajamaa dirashanagha ghadi na ghadi.
Ikabonyeria wandu wisighe machu wije malagho sa wandu wabaa. Na dikadikiana digale diche ituku izima dichewagha ndoe nicha.
Dikasea kidombo dikangira PURE yedu nandenyi na dikawoka charo cheghalua gimbe cha Mrughua.
Ugho mori ghose ghore rideka ni ra mramba. Na kila iro wuda ridekara kireti chose.
Siasa naro rikawoka na wa mrughua wikawoka kukumbiana memu na wa mwanda. Malagho gha mramba ghikaranganywa na gha Isanga Iwishi Ranch.
Wa mwanda waamba mramba na Isanga Iwiahi ni jawo kwa huwo mmrughua ungi usetime kuenja gimbe yake aja. Wa mrughua nawo waamba mmwanda usetime!
Ikakaiya mpaka ikabonyeria MP wa Mwatate iyo ngelo Hon. rtrd Major Marsden Madoka uche amua malagho ghisekechabusa mbembe ra chilu.
Ituku ja mwandu wa mrughua wekuduka wose putu mpaka kwa Mnengwa, wichesikiria na madu ghawo weni wisekekaiya weghorelwa seji mwandu ghuiidie. Mwandu ghokundawuya ghwa mbembe, kila wandu wikikunda ndoe ikaiye ni yawo wieka. MP Rtrd Major Madoka ukafunya ilani kwamba mndungi useendesara mbuwa sena mpaka wikabilo ripoti ni chifu wawo.
Mwandu ghukasiria anyao na mpaka linu mramba ghwaduagha ni ‘NO MANS LAND‘ na wa Mwanda waduagha wikimilia ndoe ya Isanga Iwishi Ranch mada, se title Deed yeka Mrughua.
#KenyaNeedsProperLandReforms
#LandDemarcationIsTheAnswer
#WadawidaWoseIsangenyiKwaela
By Kwaela News Network (KNN) | Governance & Accountability The seven-day ultimatum issued to…
The days when political party waves and symbolism single-handedly determined election outcomes in Taita-Taveta…
The growing controversy surrounding the financial management of Taita Taveta County has taken another…
Perhaps one of the most ironic moments of Governor Andrew Mwadime's appearance before the…
Affected families in Mlambenyi, Golani and Mto Mwagodi face a February 2027 deadline as the…
During a Senate Public Finance Committee meeting, Taita Taveta Governor Andrew Mwadime, popularly known as…
View Comments
Chawucha mwandeo kwa kumumua maza iri kwa kiteto cha kidawida. Chasinga hata, chakaia sa kimanga cha mbumbu na maduma. Kurasimilo na ngelo kwa ngelo kumumuo malagho sa agha kwa kiteto cha kidawida....eko ngelo pia newonie malagho gha machi malacha (maji marefu) ghikanigheshera kula sana...chawucha sana
Chawucha Abo kwa kuja malagho gha wulemeri sena kwa kiteto chisingie cha kidawida.
Hata ini nasingilwa sana ni kidawida chakedu.
Ngelo imboie.....
Kuamua na kumeria ughu wuda ni kulola historia kamili ya mumrughua na mumwanda kunughana na iyo ndoe.
Chawucha mruna; ighi malagho na Isanga Iwishi yafai ghitatulo na wuloli. Wa Mwanda wisekereda wuda wiseghudimaa. Serikali yamerie kunekana cheti.