Niloli damenyero dikamenyeka na kurulwa nguwo dikabaki mtughuta imbiri ya izungu ibaa kwa wundu gholemwa nikulola chia rejizoghora kutumia mali ya magho na wuzuri ghwahenga ghuko isangenyi.
Iji ni ilagho yidifae sa warasimilwa wa isanga ja dawida, saghalla na tuweta dijiririkabye na kujilolia itumbulio jiditesia kuzoya itakoni/itanaha dikisoghoda ngelo richagha.
Yakundikane diwadane na kukaia kindo chimweri na wadumiki wedu andu kose kufuma sangenyi na chakusea kwa weni Mghosi Madongo.
Hata ngera magho gheko kwa wulongozi ghwa kitiri kibaa cha muisanga, weke mafunda wedu waje diwinekie nguma yedipoisira malagho nicha aje aighu mzi ghwa wundanyi, widima kufindika chia rose rawatumilwa ni wandu wazima kuchuma magome na magho ghedu na kudisigha sa wana wa nyonyi, mae ukabonywa mbogha ni weke Mwaisoka aje paranga. Yawifwana wikaiye kidombo andu kumweri, wikaiye na mawono ghiwadana na kwa wunicha kwa izanga/isanga jedu jighokie nandingi loliloli.
Na kwa waje waisanga jedu wikumbie ndighi kwakukota magho, widima kuwadana na kuwika ndighi andu kumweri, kujidederia kwa nguma yaighu isangenyi, na kukandika ikwanyiko ja wandu wekota magho. Makwanyiko sa agho ghidima kukaiya andu kose waisanga wawekota magho na ghichadimisha kuchurikia kwa ndighi yelegheria na kuzighanira magho ghedu dighikote diweni na dighiuze na kughilolia andu kouzira diweni.
Nguma ya Mghosi M-baa Mruttu kwa ngelo yake odinekieghe maghesho ghezoya mtambo ghoghioghosha kughielesha, na kughibonya ghikaiye na ighuri ja ighu na hata itakoni maghesho sa agho ndeghiwonie mwengere. Nguma yaitakonyi Ikiwadilwa ni Mdumiki M-baa Mghosi Uyelie, Samboja kuyidia kwa Mdumiki wa Kawi wa isanga jedu, Uyelie M-baa Majala naomoni wawewonyera oko na maghesho sa agho. Diasodasoda sa vichula dikiweseria ngera uchakatisha malaghiro gha wusaghui ghwawo amu yiabakia ni kuleteshwa wuki na kusighilwa ndemu.
Wandu waje nawo wawelindia ndoe relisha, yawifwana wizighane ngelo rewika vala vawo kwa mafundiko na wandu wekota magho kufuma andu kuzima, mafundiko agho ghikaiye nicha kwa muisanga na ghikaiye kwa ngelo ikaiyagha yereda manori ghipoiye.
Malagho gha aje Kishushe dawonie Mdumiki wa Wundanyi, Danson Mwashako ukiwadana na weke mafunda wa mzi ghwake ukikaiya Newton Kifuso, Mghosi M-baa Mdumiki wodidederia mzinyi na aje Merobi Jones Mwaruma, M-baa Masawi odumiloghe ni Makizende wa Isanga, Uyelie Granton Samboja na wadumiki wazima wori wikinughiria makundiko gha wabonyi vuya na wandu wa aho kwa mnekelo kuela sa wajighe wa Mbololo, kwa kutesia kuwikwa vala eri malagho agho ghefunukua chuma ghikaiye ghelongola. Kuwokia kwa mtalo ghwa matuku ghiidiye, malagho mawishi karakara na seji wewikie vala ghazoiye kuwoneka kubonywa.
Ni mashiniko mabaa waisanga wahenga wiko wahaja mbaa kukaiya na kusowekelwa kwa ndonyi putu, dikikaiya na magho ghikundikagha wurumwengunyi ghose. Wunekwa sa ughu ghwadima kudipoisira Isanga jedu jose na dikaiye nicha kuwokia itanaha na hata vivalwa vichagha. Weke mafunda aho mzi mbaha Wundanyi, mzighane seji mtesia kulindia mali iko kwa wungi Dawida, Saghalla na Tuweta. Kwa wulongozi wokoni ghwa lsanga jamzedu, zoenyi kuwika vizoya va wuya vidima kuwika matuku ghichagha ghisekaiye na mdamu isangenyi ulala mdinyi, ulemwa ni kusoghora wana wake wipate malagho gheredelo ni muela ngoya, ubwaghwa angu ngera usumbulwa ni makongo, ulemwa ni kupata machi na ghamu ghiko chiki ghighokie loliloli. Kwa kubonya huwu Isanga jedu jichafwanwa na kureda maghenyi wichagha sena na mecha.
Newangiloghe marina nighikunde nandighi ela ghizamie gha Francis Machemba (Nikeli Sibi) Mwana uilelo ni imbu.
IRUMU JA MWAMBIRWA
By Kwaela News Network (KNN) | Governance & Accountability The seven-day ultimatum issued to…
The days when political party waves and symbolism single-handedly determined election outcomes in Taita-Taveta…
The growing controversy surrounding the financial management of Taita Taveta County has taken another…
Perhaps one of the most ironic moments of Governor Andrew Mwadime's appearance before the…
Affected families in Mlambenyi, Golani and Mto Mwagodi face a February 2027 deadline as the…
During a Senate Public Finance Committee meeting, Taita Taveta Governor Andrew Mwadime, popularly known as…
Leave a Comment