Categories: Voice of Reason

Kufunga boi kengele

By Fred M’mbololo

Ko kala koreghe na mghosi umu uwangwagha Mwachala na orekoghe ukikanya na kichuku chake chose na longe nyumba imweri m’baa loliloli.

Ela iyo nyumba yake erekoghe yachua mbewa pacha kula andu, iro mbewa naro rerekoghe na vichuku vawo vilazi koni ainaho. Ivo vichuku va mbewa verekoghe vikicha, wiroghua mbewa wambao kwa iyo nyumba ya uho mghosi mpaka ukasowa sere ngolonyi kwake.

Sa rimu mbewa hata rerekoghe rikivika ighana, iro mbewa rikareda ndasanya na ndengwa mbaa kwa uho mghosi Mwachala na kichuku chake. Iri mbewa rikaka rikaja viro vose verekoghe kainyi na aho irikonyi wokoni.
Nakio niko reko rikibonya makelele mpaka uho mghosi Mwachala na kichuku chake, wikasowa dulo putu kio chose. Iro mbewa rerekoghe rikighenda kula andu rikisarigha ela redeboilwa ni irikonyi kwa wundu ghwa vindo veresigharikie aho.


Ni wasiki muka Mwachala odwaghora zai, ija ngelo waingia iriko kwa wundu ghwa ija hasara iro mbewa redwa mredea ela omoni na mmigho wake na wana wake wikasowa ilagho jebonya. Mbewa iro naro redwaja vindo vadungwa wusungu ni uho mundu ela ndekuna ingi edefwa maana redeka rakola razaia kuja ivo vindo vedwasigharika na kunywa machi aho irikonyi eri ipunguze wukalo ghwa ughu wusungu.

Nao ituku jimu mwachala mruna mtini na wana wake wikacha mroghua na wikimredie boi imu.
Iro mbewa redammwona boi rekabwaghwa ni seko na kukotiana weni kwa weni, wei ni nyamanduki yaredwa nyumbani isukie nandighi huwo sena iko ya mataranga gha chilu na gha chokwa wokoni sa fulo.
Weke mbewa wikaghora uho boi orekoghe ukilala, ukiloda na kun’gona nandighi nakio.

Luma lwa kenyi, iro mbewa rikamanya iyo boi ndesingie putu, wendawoka kuwiwingisa na kuwibwagha ni kuwija sa vindo. Ikakaia wakati ghoghose, iro mbewa rerekoghe rikilola masighariko gheja aja irikonyi wedwapata iyo boi yalala aho irikonyi.

Iyo boi eko ibirie shuu na endawona mbewa ringi endwawuka na iseghe ibaa na kuwinga iro mbewa na hata kuriwada na kurija mpaka iro mbewa rikasowa sere putu na hata vindo veja wokoni aja irikonyi kwa wundu ghwa iyo boi.
Luma lwa muda mtini, iro mbewa rikawangana mwandunyi eri wilole chia efunga uho boi kengele singonyi, amu uho boi edeka wameria kubwagha mbewa ndazi na wana wawo. Mbewa na kichuku chake wikaamua elola chia efunga boi kengele kwa singo, niko iji waida, wipate kusikira kengele na kukuvisa na kukukira irangi jawo jeni.


Mbewa rimu naro rikatima chia imu, sa kulwa na uho boi ela rikasimwa kwa ndighi na kubarilwa andoenyi na kubwaghwa, sena mbewa rimu rikazerana wei rija mbewa ndini niro, reko na wuya na kulasa iseghe, naro rikanekwa chaghu chefunga uho boi kengele ela naro rikalegha kubonya huwo rikighamba wei rija mbewa m’baa nero riichi kulwa wuda na sena rawadie cha mbela na mwambori amu iro niro riwokie rikawona iruwa imbiri ya iro mbewa ndini.

Wikarashana na kubonya nganyi aighu ya ni ani ukundikane ufunge uho boi kengele ela ndewichepata chia ingi efunga uho boi kengele mpaka idimeni. Kwa huwo hata agha matuku mbewa raduagha rikibwaghwa ni boi na rikawona boi radawuka iseghe na kughenda maghumaghu eri risakechajighwa sa vindo ni weke boi wa idana.

Kwaela News Network

Leave a Comment
Share
Published by
Kwaela News Network

Recent Posts

TAITA TAVETA: SEVEN DAYS HAVE ELAPSED — HAS SENATOR KAJWANG SENT WAKUJAA’S GOVERNMENT FILES TO EACC?

  By Kwaela News Network (KNN) | Governance & Accountability The seven-day ultimatum issued to…

17 hours ago

THE ERA OF POLITICAL EUPHORIA IN TAITA TAVETA COUNTY IS OVER

  The days when political party waves and symbolism single-handedly determined election outcomes in Taita-Taveta…

1 day ago

TAITA TAVETA: CAN THE DCI CRACK THE NUT? DORCAS MLGHU’S PUBLIC OUTBURST PUTS COUNTY EXECUTIVE UNDER FRESH PRESSURE

  The growing controversy surrounding the financial management of Taita Taveta County has taken another…

2 days ago

THE GOVERNOR DISCOVERS FISCAL DISCIPLINE — FOUR YEARS TOO LATE?

  Perhaps one of the most ironic moments of Governor Andrew Mwadime's appearance before the…

3 days ago

NDARA B LAND DISPUTE: 63 RESIDENTS SERVED WITH THREE-MONTH EVICTION NOTICE FOLLOWING COURT RULING

Affected families in Mlambenyi, Golani and Mto Mwagodi face a February 2027 deadline as the…

3 days ago

THE WRONG TIME: GOVERNOR WAKUJAA’S DEFENCE

During a Senate Public Finance Committee meeting, Taita Taveta Governor Andrew Mwadime, popularly known as…

5 days ago