View feom Godoma
Mghosi Shaki – RIP, babuu wa Ken Maganga udeka na waza yake aja Mboghonyi kirimba cha lughongo lwa Mwasoko luwari lwa Godoma.
Mghosi wa wandu udeka ukilisha mifugho rake moni kufuma luma lwa kesho na luma lwa kenyi wariwunja wazenyi na wachongorua mariwa ghake na wandu waendaonda..
Ini nao nedeka nikilisha Ngachi ra kedu kiralughu cha Mwamata, cha aje itwangi jewhwada machi gha Godoma jiko.
Ijo itwangi nijo jedewada machi ghenyughwa ni wa Godoma wose kabla Borehole ya Nyangoro isekotero, ela sena ndejerighiloghe sa nicha hata mifugho na hata nyamandu ra isakenyi redovika anyao ribare kau na rifume.
Ituku jimu siko muomwa ni ngolo umu ukaamua kubonyera wandu wa Godoma kinyanya.
Mndu m’baa woruwu na sombe rake ra cheru raenga, ukaenda ukazurumia itwanginyi kondenyi jeniji jiko na machi ghinyughwaa ni wandu koisi na ondameria kuogha sena kwa kuomwa ni ngolo kwake, ukawhwada ukawaya madeng’ena ukaghibarabara na ukaghikumba itwanginyi na ukafindika machi na malemba eri ghisesee cha Godoma!
Machi ghikachua Itwanginyi zii na wandu koisi wikasowa machi putu kwa matuku ghisepunguagha adadu na aghaja malemba ghezibieghe machi ghendawoa, machi ghikazoya kusea sena. Ela Itwangi jachura wuchafu ghwa Madeng’ena zii na ghanuka fuu.
Koisi godoma wandu ndewimanyire whwasi ghwachea hao na machi ghedawoka kusea wikawunjira Mlungu chawucha na wikawoka kudaya machi ghawo kama kawaida.
Kila agho machi gheka ghilue saki ndeghiwewoneka kulua. Sigha wandu wiwoke kulumwa ni vifu na kufwaya. Angu Maghanga nagho nigho agho, Mlungu ukalindia Ng’ondi rake.
Na ituku jimu nikilisha ng’ombe rapo nikawona seji uo Msawi ubonyere Itwangi, nikaenda nokaghoria mao. Shwawori Riboti ravika kwa Mghosi wa Lughongo wa Godoma. Mghosi wa Lughongi naomoni shwawori ukaduma wandu wicheoghosha Itwangi.
Wandu wejoka na iseghe na malulu ghose na kawhe widemanya ni nani obonyereghe ugho wusawi ngera ijo ituku ndoojiwangwaa. Udabarwa chongo ni womi na weke beleshi na wimrike kilembenyi noko.
Read Also: KUGWA NA KUWUKA ERI WANDU WIWONE MWENGERE DAWIDA
Wikaoghosha Itwangi wikianyira uo m’bwaghi, mghosi umu ukawawhwa mpaka ukadoma machi na ukatasa ukighora uo m’bwaghi ukabonya huwo sena ubwagho ni ngengefu!
Nendakotia ngengefu niki, nikazerwa ni wukongo ghuzamie sa Heart Attack, angu stroke. Ghudawada mndu na wabecha kawi kadadu na mara moja waluma igunia. Yaani ndoghuboiye putu.
******************
Haya siko ituku jimu nakwana na mghosi Shaki ukilisha mifugho rake na angu nedowhawhwa ni kukaiya na ndisha ya Ng’ondi nikamkotia kela wadima kunituruya Ng’ondi ndazi niendelisha na ikavara yapo nimwhunjire mghoma ghwake. Mghosi wa wandu angu hata ndookoghe na choyo chingi, ukanizera Mlimi ndouimwagha Mbeu, na ukanikotia kela neko na kighowa chingi uniwadire ngelo cheniyo nigale nayo. Senee kighiwa kwa huwo ukanizera nilole ituku niendeonda ng’ondi Maranu kwake.
Sechepata nafwasi putu saki hata wavi wapo weni nendawighoria ndewenikanieghe kwenda kuturuilwa ng’ondi ni Mghosi Shaki.
********************
Siko ngelo yavika mghosi Shaki ukahamisha maranu ghake cha noko cha kisemetinyi kavui na kandaka kwa Henry Kilato. Maranu gha mboghonyi ukaghifuchua na ukaendaagha mawishi.
Uendaenda Kisemetinyi ng’ombe na ng’ondi rikangia maranu sa nicha ela Mburi rikakutamba toe nderingiagha maranu mawishi na dimeghadi imu hero rikawhwada chia rikawuya mpaka Mboghonyi maranu gha kala. Kuvika aje rekua maranu ghafuchulo na hata nyumba ya mlisha yakabilo nganda na vikuro na misonguya ikadukwa ni wakeku putu ikaenda korwa mbande.
Mburi rikawoka kukusasara na isaka. Rikawoka kukulisha reni na ralala isakenyi sa weke shaya na sarigha.
Ngelo imu hero rajoka mpaka maghonyi noko cha mongonyi kwa mghisi Mwaliko – RIP babuu wa Duncan Malusha, rakundavika mbuwenyi kwa weke Oscar Wadero riendedafuna mairungi, mara hero raida cha noko cha Lughongo lwa Lughijo, rakushaghala na mbuwa ya surukali ya forest na hero raendaelia Mwakishoo kwa weni Karakacha.
Awaje wiseichighi ni mburi rani wikawoka kuraratua wei ni mburi ra mashetani angu raja reni.
Ituku jimu hero raida mpaka shale rikaenda fumia mbuwenyi ghadi ya mghosi Pastor Mwamburi wa Kilao – RIP, na rikangia rikadafuna mngulu wake mbuwa yose na seji okoghe wadegheda na wafunya mboi nicha. Angu mndwawandu ni Pastor hata ndeochefunya mwandu ghundi wei uahano mngulu wake.
Ini nikilisha ng’ombe rapo nikeriwona natima kuriranganya na iro mburi eri ninyinyolie niwhwade imeri niifunge niilisheghe ela ee nisoghoragha ng’ombe kavui na rereni hero radughuna cha noko.
*****************
Siko ituku jimu dawhwadana wajamaa wasanu dirilangarie diwhwade ndazi iwuye yedu angu rideka raja reni meri ndazi.
Dikarigoria sanicha raja rikaghuda na rikadima kijunyi. Angu ini nuo nekoghe nitarikie kwa kukaiya na muwi mtini ela sena nekoghe na ndighi rikate, nikanekwa chaghu che nyonyolia mpaka niwade ndazi.
Kwa wujuzi ghwa ighu nikanyonyolia mirughundienyi nikihepa shasha ra misisina, mivudi na minymjwa ra videnya bila hata kuringisha nyasi “kwasha” na nikagoria fwandi ndazi yekoghe iserie isunya na ifugie sombe ra cheru ndang’acha, nikaghora niecheni nigurianagha nayo, nikaiwhwada mwindi ghwa nyuma. Mara shashalu mburi rose rawuka na rikawoka kulasa iseghe.
Ijafwandi nayo naimazira mwindi ela yakuchuma kifwa. Sigha niiso Mlungu Mavi ni fwandi na nikakurudulwa mpaka minjonyi ra videnya koighu ela naimazira shuu.
Nikawanga wajamaa wiche na iseghe, “naiwada” nijabechuja. Wekuka na kirimba wiche nitesia kuimazira.
Yaani Henry ovika wei uiwade mwindi ughuja ghumu na na hata useghumazire sa nicha, fufunu ….. , yanifufunuka. Na heyo iseghe nitetesie. Ikanugha wambao na isi dikasighwa kimusu dikishinika sa Janetu wa Mwatati, daidwa ni fwandi.
Nesighwa nikinuka ihia ja fwandi ighisere na nikateselwa kukua minjwa na dikagala na waya ghodu vala viduu.
#MemoriesAreMadeOfThis
#WadawidaWoseIsangenyiKwaela
By Kwaela News Network (KNN) | Governance & Accountability The seven-day ultimatum issued to…
The days when political party waves and symbolism single-handedly determined election outcomes in Taita-Taveta…
The growing controversy surrounding the financial management of Taita Taveta County has taken another…
Perhaps one of the most ironic moments of Governor Andrew Mwadime's appearance before the…
Affected families in Mlambenyi, Golani and Mto Mwagodi face a February 2027 deadline as the…
During a Senate Public Finance Committee meeting, Taita Taveta Governor Andrew Mwadime, popularly known as…
View Comments
Eeeh bwana kidawida chako chekua loli. Tima kudibonyera glossary ya malagho gikurie Chawucha kwa lughano kwako lusingie kweli. Rasimilwa.
Rasingie loliloli chughano rako,kidawida chiko so fine.Bonya kuandike vuo va kidawida.U hav wat it takes.