Categories: Voice of Reason

GHA WA WERUGHA GHIKAKULEMA KUSEGHESHE GHA WA MRUGHUA KUGHIRUGHUA

Niko klasi cha kasanu siko dasikira wei Ng’ombe ra jirani odu, mghosi Kifete – RIP ralagharie waza ndazi. Mghosi wawokie kulola ng’ombe rake kufuma shale kavui na kwa weke Abeyd Mwermbury, Mjomba Mnisi Shadrack, Francia Chari na ZedemMwangoo mpaka Mwashuma kavui na Salt Licks bila hata dalili ingi! Ng’ombe rendalaghaya Vua idefuma ikanya kio chee na hata kunughia Chwau ndeyedimikagha hata kutini.


Siko Mghosi Kifete ukawagha wana wake na waghenyi wake wemtesie kulola ng’ombe! Wamu hewo wikaida cha Nyangoro wikasea mpaka Kwa Mnengwa wikawuria na Kandala kwa weke Henry Kilato na wikachafumia Godoma shighadinyi kwa Robert Kiwo ela wewuya vala viduu, hata mavi gha ng’ombe rawo gheni wiseghiwone. Kesho yake luma lwa kesho dikinywa chai chedu shighadinyi, na kwaichi mdawida wawhangaa chai chidike, Muovakadonyi kosi siko diwonaa mjama umu dimwichi sa nicha, dem’wangaa Mine Alone – RIP, angu odebonya shughuli rake man solo. Kwawo ni ko kumonu kavui na mbenge ya weke Oscar Wadero, ukicha cha mzedu !

 

ALSO READ: KUGWA NA KUWUKA ERI WANDU WIWONE MWENGERE DAWIDA

Mjamaa kawaida yake mwendo ghwake ghudeka ni ghwa ‘aste aste’ na kudundadunda mtindo ghwa vijana wa enzi ra weke Pepe Kale, yaani sa mndu uvinaa Kudhawi cha slow motion, ela ijo ituku udeka washalua lwau kweli, sena wang’urang’ura ukilawua isanga ichia na ichia!

Dikatambwa na sista wapo ukakotia, “wele uja ni nani uchaa wafwanana na Mine Alone huwu, sena ushaluagha lwau wuja?” 

Nikawikiria, “hoja ni omoni.”

Siko wasoghodasoghoda ukavika kavui na dikawona loli ni omoni, kawaida yake ndooderoghua mndungi hata ukukuo shighadi kwako wakuida kituri sa mndu watukira kisachi! Isi udewoka kudiroghua angu ituku jimu udeamba udiide kituri kila koshi yedu ‘KICHECHE’, ibirie shuu sa mwachaka wa tuweta, yekoghe shighadi yalala igunienyi, Mine Alone na kituri chake, odwalwa iseghe iseghe ni Kicheche mpaka ukadungishwa mlungumavi kusea cha kijalenyi, hata kudunda kukamlaghaya ghafla, na mvuto ghwake ghukarashulwa mroro. Bahati yake iboiye ndoolumiloghe.

Kufuma ijo ituku udeghalusa chia angu ikabidi uidie na kedu wawoka kuroghuo uko ko kula!Siko ukadiroghua na ukakotia wei, “ngera mwaniwonia NG’OMBE rapo aha”?Dikazighanana dikakundadungwa ni seko, na dikatambwa Mine Alone washamie ndisha lii, na jingi disemwhonie hata na ndaghina wala kiwale cha mwana wa nguku , didemmanya kwa kumarisha maduma, maghuwa, vitunguo, Vizungi na ngelo rimu tunguja na mavalo mazima mazima gha mbuwenyi!


Ukekua vilambo mbuwenyi kwako vakaiya tayari odengia mbuwenyi moni na wawoka kukuwhida, sena nadime Iruwa jikiaka! Mbuwa ya weke Oscar Wadero na Cyprian Mghanga oiwoniagha kuchumba!

Haya, dikamzera “Ng’ombe ringi ndediriwoni,”

Paap, ukaenda ukirilola noko imbiri cha Mwakishoo, kwa weke Onesmus Kimunda.Siko divikagha skuli dasikira kila ni ng’ombe ra Mghosi  Kifere riiwilo ni Mine Alone na sena uo Mine Alone angu jingi uselishire ukawuya ukarilaghasha!Hata iruwa jiseneng’enera dikawona Mine Alone udaserwa cha Ofisinyi kwa Chifu mndendelenyi, wafungwa na kamba ra ng’ombe na wazitwa vangu va ndkmoko ni Mghosi Kifete nasub Chief Isaac Mnyanya – RIP, saa widabwagha choka!Mvuto ghwake ghudeka ghwarashulwa ghukakaiya sa skati ya msalalia, na mghongo ghwarangana na bagha yake cheni putu. Mbeo ikakaba mvuto ghwaalulwa na ghwachamangia kiwonu. Na angu wafungwa mikonu na kamba hata ndoudimagha kughusera sena! Sena ochaisirwa skuli ngelo diko break, yaani mndwawandu wawezozwa ni wana wa skuli wose seji mgumu ghwasighwa mwari. Bahati iboiye mkomu okoghe kavui, sigheshagha kela okoghe ni nani mae, ukawada leso wake ukaenda ukamdisa kiwonu na ukaiswa noko cha Mndendelenyi.Dikasikira wei kabla uselaghashire iro Mifugho udeka wawhwada Fwandi ndazi ukaidumbua marangi na ukakulwa na nyama waridanda idawonyi na rimu mghambenyi. Bahati izamie okulwanya na mrongo ghwa fwandi ya mghosi Kifete! Ughu mrongo nigho ghojoshereghe Mghosi Kifete malulu na ukamlima kimengo cha kisina cha madu mpaka ukawona miramira na wikawonadima kumfunga na kamba.

Mjamaa ukaiswa noko ukaenda ukahukumilwa kifungo chake cha meri sita na dikamwhona wawuya na shongolo yake ya mka waikamba.

Mifugho naro reendakulwa raja rikanywa machi na rikadima ngololenyi noko mbai cha Mongonyi kwa weke Duncan Malusha na aje weke Elbroda Mghoi weduelindia fuwe wiko watini !

To be CONTINUED…!!!

…#MemoriesAreMadeOfThis

#WadawidaWoseIsangenyiKWAELA

Mwachere Shuma

Leave a Comment

View Comments

Share
Published by
Mwachere Shuma

Recent Posts

TAITA TAVETA: SEVEN DAYS HAVE ELAPSED — HAS SENATOR KAJWANG SENT WAKUJAA’S GOVERNMENT FILES TO EACC?

  By Kwaela News Network (KNN) | Governance & Accountability The seven-day ultimatum issued to…

18 hours ago

THE ERA OF POLITICAL EUPHORIA IN TAITA TAVETA COUNTY IS OVER

  The days when political party waves and symbolism single-handedly determined election outcomes in Taita-Taveta…

1 day ago

TAITA TAVETA: CAN THE DCI CRACK THE NUT? DORCAS MLGHU’S PUBLIC OUTBURST PUTS COUNTY EXECUTIVE UNDER FRESH PRESSURE

  The growing controversy surrounding the financial management of Taita Taveta County has taken another…

2 days ago

THE GOVERNOR DISCOVERS FISCAL DISCIPLINE — FOUR YEARS TOO LATE?

  Perhaps one of the most ironic moments of Governor Andrew Mwadime's appearance before the…

3 days ago

NDARA B LAND DISPUTE: 63 RESIDENTS SERVED WITH THREE-MONTH EVICTION NOTICE FOLLOWING COURT RULING

Affected families in Mlambenyi, Golani and Mto Mwagodi face a February 2027 deadline as the…

3 days ago

THE WRONG TIME: GOVERNOR WAKUJAA’S DEFENCE

During a Senate Public Finance Committee meeting, Taita Taveta Governor Andrew Mwadime, popularly known as…

6 days ago